Bat egiteko

Gaur egun bizi dugun polarizazio politikoak ñabardurarik eta aukerarik gabeko etorkizuna erakusten dio gure gizarteari. Gure ustez, euskal gizarteak ez du onartzen blokeo egoera hau eta komunikazio, elkarrizketa eta akordio gehiago eskatzen du. Horregatik, esperantza eta ilusio gune bat ireki nahi dugu, honako lau printzipio hauetan oinarrituz:

Indarkeria eza eta giza eskubideak defendatzea, hau da:

Indarkeria eta estortsio era guztiak gaitzetsi eta ETAri armak behin-betiko utz ditzala exijitzea.

Indarkeria eta terrorismoa jasaten duten eta jasan duten pertsona guztiak eta giza eskubideak nahiz askatasuna urratu zaizkien pertsonak eraginkortasunez defendatzeko eta horiei guztiei elkartasuna erakusteko konpromisoa.

Zorrotz errespetatzea giza eskubide guzti-guztiak eta pertsona guzti-guztien askatasuna.

Elkarrizketa Politikoa eta bere inplikazioak:

Konpromiso argia elkarrizketaren alde, Bakea lortzeko helburuz eta gure gizartean dagoen normalizazio politikoaren eta elkarbizitzaren gatazka konpontzeko bidetzat hartuz.

Elkarrizketa bultzatzea distentsioaren, leuntzearen eta tolerantzia demokratikoaren bitartez. Elkarrizketari uko egitea, konponbideari uko egitea da.

Elkarrizketa irekia, inor baztertu gabe eta baldintza politikorik gabe, alderdi politikoen mahai batean, bakarrik bide baketsu eta demokratikoak erabiliz, gure proiektuak defendatzeko konpromisoa hartuz.

Euskal gizartearen erabakiak errespetatzea, eta ondorioz:

Euskaldun gehienen nahiak orain arte sortutako Erakunde eta esparru juridikoak errespetatzea; baita ere, Erakunde nahiz esparru horiek aldatzeko eta eguneratzeko zilegitasun demokratikoa errespetatzea.

Labur esanda, errespetua euskal gizarteari galde dakion eta, horrela, euskal gizarteak askatasunez, bakean eta demokratikoki erabaki dezan etorkizuna.

Gizartea eratzea, hain zuzen ere:

Euskadi eratzeko konpromisoa, euskal gizartearen aniztasuna onartu eta onetsiz, eta integrazioa, aurrerabidea, gizarte justizia eta gutxien dutenekiko elkartasuna eredutzat hartuz.

Guztiei irekitako eredua, integratzailea eta askatasun, ongizate eta elkartasun erreferentea izango dena, gure Herriak XXI. mendean aurrez aurre dituen aldaketa sakonak arrakastaz gainditzeko gai.

Gure konpromisoa, printzipio hauek defendatzea eta garatzea da, Euskadin itxaropen eta konponbidean oinarritutako aro berri bat irekitzeko.