Bestelako Xedapenak

Justizia, Lan eta Gizarte Segurantza Saila

EBAZPENA, 1999ko azaroaren 29koa, Enplegu eta Prestakuntza zuzendariarena, Lanerako Prestatzeko Babespeko Ikastegiaren kalifikazioa jaso duten ikastegien zerrenda argitara ematen duena.

Justizia, Lan eta Gizarte Segurantza Sailak, 1988an prestakuntzaren arloan jorratzen hasitako jardunen ondorioz, ikastegi-sare bat sortzeko estrategia antolatu eta planifikatu behar izan zuen, etengabeko prestakuntzaren eta lanerako prestakuntzaren zati handi bat ikastegi horien bitartez landu ahal izateko, baldintza onetan.

 

Horretarako, Justizia, Lan eta Gizarte Segurantza Sailak, 1988tik aurrera, dekretu batzuk argitaratu ditu urtero, Lanerako Prestatzeko Babespeko Ikastegi izateko betebeharrak eta kalifikazio hori jasotzeko prozedura arautzeko, eta ikastegi horiek beharrezko tresneria teknikoz hornitzeko diru-laguntzak emateko.

 

Edozein administrazio publikoren jardunak gardena eta publikoa izan behar duenez, abenduaren 24ko 303/1996 Dekretuak 7.3 artikuluan ezartzen du ezen, urtero, Enplegu eta Prestakuntza zuzendariak ebazpen bat emango duela —zeina Euskal Herriko Agintaritzaren Aldizkarian argitaratuko den—, dekretu horren babesean Babespeko Ikastegiaren kalifikazioa jaso duten ikastegien berri emateko (dekretu horrek Lanerako Prestatzeko Babespeko Ikastegiak arautu zituen, bai eta ikastegi horiek tresneria teknikoz hornitzeko laguntzak ere).

Enplegu eta Prestakuntza zuzendariaren 1997ko azaroaren 28ko ebazpen batez (1998ko urtarrilaren 5eko EHAA, 2 zk.), 1988tik aurrera babestutako zentroen berri eman zen; ebazpen honekin, berriz, 1998an eta 1999an babestutakoen berri ematen da.

 

Horrenbestez, honako hau

EBATZI DUT:

Lehenengoa.– Ebazpen honen bitartez jakitera ematea ezen ebazpen honen I. eranskinean ageri diren ikastegiei Lanerako Prestatzeko Babespeko Ikastegiaren kalifikazioa eman zaiela 1998an, abenduaren 24ko 303/1996 Dekretuaren babesean.

 

Bigarrena.– Ebazpen honen bitartez jakitera ematea ezen ebazpen honen II. eranskinean ageri diren ikastegiei Lanerako Prestatzeko Babespeko Ikastegiaren kalifikazioa eman zaiela 1999an, abenduaren 24ko 303/1996 Dekretuaren babesean.

 

Vitoria-Gasteiz, 1999ko azaroaren 29a.

Enplegu eta Prestakuntza zuzendaria,

JESUS MONREAL ZIA.

 

I. ERANSKINA

Ikastegia: Iurretako Bigarren Hezkuntzako Institutua.

Herria: Iurreta

Espezialitatea: Fabrikazio mekanikoa: Mekanizazioa

Ikastegia: San José de Calasanz Ikastetxea

Herria: Santurtzi

Espezialitatea: Osasuna: Erizaintzaren Laguntza

 

Ikastegia: Antoniano Ikastetxe Politeknikoa

Herria: Zarautz

Espezialitatea: Metala: Trokelgintza eta Moldeak

 

II. ERANSKINA

Ikastegia: San José - Maristak

Herria: Durango

Espezialitatea: Fabrikazio mekanikoa: Proiektu Mekanikoen Garapena

Ikastegia: Zumaiako Institutua

Herria: Zumaia

Espezialitatea: Elikadura: Barazki, Haragi eta Arrain Kontserbagintza

 

 

 

 

---

Deskribatzailea:

• BAIMENAK; IKASTETXE BABESTUAK; LANERAKO HEZIKETA